კურორტი გოდერძი

ბათუმიდან სულ რაღაც 115 კმ-ს დაშორებით მდებარე სამთო-სათხილამურო კურორტი „გოდერძი“ ზღვის დონიდან 2013 მეტრზეა განლაგებული. უხვი ნალექებით და ბუნების უნიკალური პეიზაჟებით განთქმული კურორტი ნამდვილ სამოთხეს წარმოადგენს ექსტრემალური სპორტით გატაცებული და გაუკვალავ თოვლში სრიალის მოყვარული ადამიანებისთვის. ზამთრის სეზონის დადგომისას მსოფლიოს ასიათასობით free-rider-ი ახალ სათხილამურო ტრასებსა და ახალ გამოცდილებებს ეძებს. კურორტი „გოდერძი“- თავისი უახლესი და კომფორტული გონდოლებიანი საბაგირო გზით, სხვადასხვა სახის სასტუმროებით, კოტეჯებით, საოჯახო სასტუმრო სახლებით, ულამაზესი მთის პეიზაჟებითა და რაც მთავარია, გულითადი სტუმარმასპინძლობით, გართობისთვის საუკეთესო არჩევანია, არა მხოლოდ ექსტრემალური სპორტის ამ სახეობით გატაცებულებისათვის, არამედ მათთვისაც, ვისაც უბრალოდ თოვლში გართობა და სრიალი უყვართ.

ალპური ბოტანიკური ბაღი

გოდერძის ალპური ბაღი საქართველოში მეორე ალპური ბოტანიკური ბაღია. იგი ზღვის დონიდან 1960 მეტრის სიმაღლეზე მდებარეობს. ბაღის ერთ-ერთ მთავარ ღირსებას 4000 მ2 ტერიტორიაზე გაშენებული, მცენარეებთან შერწყმული სპეციალური ქვების კომპოზიცია-როკარიუმი (ქვის ბაღი) წარმოადგენს. აქვეა მეფუტკრეობის სადემონსტრაციო სახლი, სადაც მსოფლიოში თაფლის წარმოების უნიკალურ ტრადიციას გაეცნობით, რომელიც ჯარას ველური თაფლის სახელითაა ცნობილი. ბაღიდან რამდენიმე კილომეტრში შესაძლებელია დაათვალიეროთ მრავალსაუკუნოვანი ნამარხი ტყე, ტბები, სამკურნალო ჰავითა და ტალახებით გაჯერებული ულამაზესი ადგილები. ბაღის დასათვალიერებლად ყველაზე სასურველი დრო მაისი-ოქტომბერია, როდესაც გოდერძის ალპური ბოტანიკული ბაღი მთელი თავისი მშვენიერებით წარსდგება ხოლმე დედაბუნების წინაშე, თუმცა ფაფუკ თოვლში გახვეული ბაღიც თვალწარმტაცი სანახავია.

ბათუმი - ნიუ-ორლეანი

ფოტოებზე გამოსახული ქუჩები ერთმანეთისგან ათასობით კილომეტრით დაშორებულ ქალაქებში - ბათუმსა და ნიუ-ორლეანში გვამოგზაურებს. სხვადასხვა კონტინენტზე განლაგებული ამ ორი ქალაქის ფოტოებისთვის თვალის ერთი შევლებაც საკმარისია მათი არქიტექტურული მსგავსების შესამჩნევად. ბათუმური აივნებიდან ცქერისას, საკმარისია ღრმად ჩაისუნთქოთ ყავის სურნელით გაჟღენთილი ჰაერი და წამსვე აღმოჩნდებით ლუიზიანას შტატის უდიდეს საპორტო ქალაქ ნიუ-ორლეანში. ბათუმსა და ნიუ-ორლეანს მუსიკალური გემოვნებაც მსგავსი აქვთ. თუკი ბათუმის დამეგობრებული ქალაქი ნიუ-ორლეანი მსოფლიო ჯაზის დედაქალაქის სახელითაა ცნობილი, ბათუმიც, თავისი ცნობილი შავი ზღვის ჯაზ-ფესტივალით, სამართლიანად გვაყენებს მსოფლიო ჯაზ-მუსიკის მოყვარულთა ავანგარდში.

ტბიყელის ტბა

ინტრიშის დაცულ ტერიტორიაზე, მაღალი მთების ალპურ ზონაში, ზღვის დონიდან 2018 მეტრზე მდებარეობს გულის ფორმის ტბა - ტბიყელი, სადაც წითელ ნუსხაში შეყვანილი კავკასიური ტრიტონის ნახვა შეუიარაღებული თვალითაც შეამჩნევთ. სათავგადასავლო ტურიზმის მოყვარულთათვის ტბაზე ასვლა ხინოწმინდიდან 12 კმ-იანი საფეხმავლო ბილიკით არის შესაძლებელი, გზად უამრავი ულამაზესი ადგილი შეგხვდებათ, რომლებიც მისტიურ გარემოში გამოგზაურებთ. ტბიყელის ტბას საინტერესო ლეგენდაც უკავშირდება, თითქოს ტბაში უცნაური არსება ბინადრობდა, რომელიც ყოველდღე ტბიდან ამოდიოდა და მინდორზე მობალახე ხარს საღამომდე ეჭიდებოდა. ხარი საძოვრიდან ყოველდღე ბრძოლით დაღლილი ბრუნდებოდა. როცა ხალხს ამის შესახებ შეუტყვია, ტბის ამოშრობა და უცნაური არსების ნახვა განუზრახავს, თუმცა, ყოველი მცდელობისას, კოკისპირული წვიმა მოდიოდა და ხელს უშლიდა ტბის დაშრობაში. ადგილობრივებს ეს ღვთის წყრომად მიუჩნევიათ და განზრახვა გადაუფიქრებიათ.

ლელთის ტბა

ემოდგომის უქმეებზე, ოჯახთან ერთად ბუნებაში გასასეირნებლად საუკეთესო არჩევანი შუახევის მუნიციპალიტეტში, ბათუმიდან 58 კმ-ში მდებარე ულამაზესი ჭვანას ხეობაა. სწორედ ამ ხეობაში, სოფელ ნაღვარევში მდებარეობს ლელთის პატარა ტბა, რომელიც შემოდგომისას თვალწარმტაცად გამოიყურება და დათოვლილი მთების ფონზე საოცარ კონტრასტს ქმნის. ამავე ტბაში ბინადრობს ჩვენთვის კარგად ნაცნობი კავკასიური ტრიტონიც. ბუნებაში გართობის მოყვარულთათვის ტბაზე შესაძლებელია ტივით გასეირნება და პიკნიკის მოწყობა. სანამ ტბას ეწვევით, აუცილებლად მოინახულეთ ხაბელაშვილების ხის თაღოვანი ხიდი, რომელიც ერთადერთი გადახურული ხიდია აჭარაში და სამ საუკუნეს ითვლის. იქვეა წყლის წისქვილებით ცნობილი სოფელიც, სადაც რამდენიმე მათგანი დღესაც აგრძელებს ჩვეული რიტმით მუშაობას.

მწვანე ტბა

მწვანე ტბა ხულოს მუნიციპალიტეტში, ზღვის დონიდან 2058 მეტრზე, ტყეებით გარემოცულ ქვაბულში მდებარეობს. ბათუმიდან 120 კმ-თ დაშორებული ტბა არსიანის ქედის ალპური ზონის ნამდვილი ზურმუხტია. ტბას ირგვლივ წიწვოვანი და წიფლის ხემცენარეები აკრავს, სწორედ ამიტომაა, რომ ტბა განსაკუთრებული მწვანე ელფერით გამოირჩევა, მაგრამ მზის შუქის და ამინდის ცვალებადობის გათვალისწინებით, ის თითქოს იცვლის ფერს და ზოგჯერ ფირუზისფრადაც იწონებს თავს. მწვანე ტბა მოლაშქრეებისა და ექსტრემალებისათვის გამორჩეული ადგილია, განსაკუთრებული ხალხმრავლობა ტბის ირგვლივ ზაფხულში და გვიანი შემოდგომის პერიოდშია. მწვანე ტბა საუკეთესო ადგილია პიკნიკის, კემპინგისა და წყლის ველოსიპედებით ტბაზე გასეირნებისთვის.

ბათუმის დელფინარიუმი

ნინი, ბელუჩი, მაია, ზორო, მარკო, ლოლა, ჩიბუ, ციცი, ოლიმპია და ბათუ - გეცნობათ ეს სახელები? თქვენ გგონიათ ადამიანებზე გესაუბრებით? ეს ყველაზე ცნობილი ოჯახია ბათუმში, რომელიც ბათუმის დელფინარიუმის სტუმართა პოზიტიურ განწყობაზე ყოველდღიურად ზრუნავს. დელფინები საოცრად გონიერი არსებები არიან, მათ ადამიანის მსგავსი უნარები და ქცევები აქვთ. ბათუმის დელფინარიუმი 1975 წელს დაარსდა და იგი მსოფლიოს უდიდეს დელფინარიუმებს განეკუთვნება. დელფინების სადემოსნტრაციო პროგრამა შოუს ელემენტებით და საოცარი ნომრებით დაუვიწყარ შთაბეჭდილებას ახდენს დელფინარიუმის სტუმრებზე. დელფინების შთამბეჭდავი შოუს დასრულების შემდეგ, შეგიძლიათ ამ გასაოცარ და ჭკვიან არსებებთან ერთად აუზში ითამაშოთ და გაერთოთ. ჩვენი რჩევაა ეს შესაძლებლობა ხელიდან არ გაუშვათ და საკუთარი თავი მათთან უფრო ახლო ურთიერთობით გაანებივროთ.

სარფი

სარფის სანაპირო, რომელიც განსაკუთრებით გამჭვირვალე ზღვის წყლით გამოირჩევა, ზაფხულობით ტურისტების უსაყვარლესი ადგილია. ცოტამ თუ იცის, რომ სარფი ლაზების ისტორიული სამოსახლოა. ისინი უხსოვარი დროიდან საუკეთესო ნაოსნები და მეთევზეები იყვნენ და ზღვასთან განსაკუთრებული დამოკიდებულება აკავშირებთ. ლაზური სამზარეულო გამორჩეულია საქართველოს სხვა კუთხეებისგან. არსებობს თქმულება, რომ აჭარული ხაჭაპურისთვის სწორედ ლაზ მეთევზეებს მიუციათ ნავის ფორმა და კვერცხის სახით შიგ მზეც ჩაუმწყვდევიათ.

ფრინველებზე დაკვირვება

დედამიწაზე სულ რამდენიმე ადგილია, რომელიც ფრინველების გადაფრენისთვის განსაკუთრებული მნიშვნელობით გამოირ-ჩევა. სწორედ ასეთია ბათუმის ცა, რომელსაც ყოველწლიურად მილიონზე მეტი მტაცებელი ფრინველი გადაუფრენს და თბილ ქვეყნებს მიაშურებს. მიიჩნევა, რომ აჭარა სიდიდით მესამე ფრინ-ველთა საემიგრაციო დერეფანია მსოფლიოში. შემაღლებული ადგილებიდან გადამფრენ ფრინველებზე დაკვირვება ერთი დიდი სიამოვნებაა. რამდენიმე წელია ფრინველებზე დაკვირ-ვების საერთაშორისო ფესტივალი იმართება ეკო-ტურიზმის ამ საინტერესო მიმართულების ხელშესაწყობად. „ბერდვოჩერები“ მსოფლიოს სხვადასხვა ქვეყნიდან მოემართებიან ფესტივალზე დასასწრებად, რათა სოფელ ჩაისუბანსა და სახალვაშოში სპეციალურად მოწყობილი სადამკვირვებლო პუნქტებიდან, 15 აგვისტოდან 15 ოქტომბრამდე, ახლოდან დააკვირდნენ სხვადა-სხვა სახეობის მილიონობით მტაცებელ ფრინველს.

ცოლიკოური და ჩხავერი

მევენახეობის ისტორიულ კერას აჭარაში ქედის მუნიციპა-ლიტეტი წარმოადგენს, რომელიც ბათუმიდან დაახლოებით 40 კმ-ის დაშორებით მდებარეობს. აქაური ცოლიკოურით და ჩხავერით დაწურული ღვინო ერთნაირად საყვარელია ტურისტებისთვის თუ ადგილობრივი მოსახლეობისთვის. ცოლიკოურის მაღლარი ჯიშის ყურძენი გვიან იკრიფება. მის მარცვლებში თითქოს მთელი წლის მზის ენერგიაა თავმოყრი-ლი და გემოს რამდენიმე ვარიაციას გვთავაზობს. ცოლიკოუ-რისგან დამზადებული მაღალი ხარისხის თეთრი ღვინო იდეა-ლურია თევზეულთან, ყველთან, ბოსტნეულთან თუ ხილთან. ჩხავერის ჯიშის ყურძენი გაორჩეულია შეფერილობით და გემური თვისებებით, ჩხავერი პრაქტიკულად ერთადერთი ქართული ვაზის ჯიშია, რომლისგანაც შეიძლება ბუნებრივად ვარდისფერი ღვინომივიღოთ. ჩხავერისგან დაყენებული, უგემრიელესი არომატით გამორჩეული სუფრის ღვინო იდეალურად თავსებადია შემწვარ წიწილასთან, მსუბუქად შეკმაზულ ლობიოსთან თუ ქართული სამზარეულოს სხვა დელიკატესებთან.

მტირალა

ქობულეთის მუნიციპალიტეტში მდებარე მტირალას ეროვნული პარკი, რომელიც ბათუმიდან 25 კმ-ის დაშორებითაა, ევროპაში ერთ-ერთ ტენიან ადგილა-დაა ცნობილი. მთას, რომელზეც ეს ულამაზესი პარკი მდებარეობს, ხშირად სტუმრობს წვიმა და სქელი ნისლი, სწორედ ბუნების ამ თავისებურების გამო ეწოდა მთას სახელი - „მტირალა“. მტირალას პარკი ოთხივე სეზონის განმავლობაში ათასობით ვიზიტორს მასპინძლობს. პარკში ორი სხვადასხვა სირთულის ტურისტული ბილიკია: 7 კმ-ის სიგრძის მარტივი სირთულის საფეხმავლო წრიული ბილიკი „წაბლნარი“ და 2 დღიანი (16 კმ) საშუალო სირთულის წრიული ბილიკი „ცივწყარო“. თავგადასავლების მოყვარულებს შეუძლიათ პარკში არსებული ზიპლაინით დაშვება და თოკების პარკში გართობა. მტირალას ეროვნულ პარკში სტუმრობი-სათვის იდეალური დრო ადრეული გაზაფხულიდან გვიან შემოდგომამდეა, თუმცა, ექსტრემალური თავგადასავლების მოყვარულთათვის მტირალას მთა ზამთარშიც ტურისტულად საინტერესო ადგილია.

საახალწლო ტრადიციები აჭარაში

მსოფლიოში ახალი წლის აღნიშვნის სხვადასხვა ტრადიცია არსებობს, ხშირად განსხვავებულია საახალწლო ატრიბუტიკა თუ საზეიმო სუფრასთან აუცილებლად მისართმევი კერძების ჩამონათვალი. ახალი წელი საოჯახო დღესასწაულია. ძველი აჭარული ტრადიციის მიხედვით, ახალი წლის დადგომამდე, ოჯახი ყველა განათხოვრებულ ნივთს უკან იბრუნებდა, რათა ბარაქა ახალი წლიდან სხვაგან არ გადასულიყო. ტრადიციულ საახალწლო სუფრაზე უხვად იყო აჭარული სამზარეულოსთვის დამახასიათებელი ტკბილეული და აჭარული საახალწლო სუფრის აუცილებელი ატრიბუტი-მოხარშული სიმინდი, როგორც მატების, ხვავის და ბარაქის სიმბოლო. ყველაზე გავრცელებული ტრადიცია კი მაინც ფერხვა, იგივე მეკვლეობაა. დღესაც, ყველა ოჯახი ცდილობს მეკვლედ პატარა ბავშვი ჰყავდეს, რადგან ის სიცოცხლის გაგრძელების გამოხატულებადაა მიჩნეული. ფერხვის რიტუალის შემდეგ, ოჯახის უფროსი მამაკაცი ახალი წლის დასალოცად სადღეგრძელოს წარმოთქვამდა და ეზოში თოფს გაისვრიდა სიხარულის და სიცოცხლის გაგრძელების აღსანიშნავად.